Республикада "Фермер мәктәбе" проекты старт ала

Татарстан Республикасы Авыл хуҗалыгы һәм азык-төлек министрлыгы «Фермер мәктәбе»укыту проектында катнашу өчен конкурс сайлап алуы башлану турында хәбәр итә. Программаны Татарстан Республикасы Авыл хуҗалыгы һәм азык-төлек министрлыгы гамәлгә ашыра. Укулар Казан дәүләт аграр университеты базасында узачак.

Мәктәп кысаларында Россельхозбанк "нульдән" нәтиҗәле фермер бизнесын төзүгә теоретик һәм практик өйрәтү, шулай ук үз эшен башлап җибәргән эшкуарларга квалификацияне күтәрү программасын әзерләде.

«Фермер мәктәбе» проекты яңа финанс яктан тотрыклы һәм рентабельле фермер хуҗалыклары булдыруга ярдәм итүгә, инде гамәлдә булган нәтиҗәлелекне күтәрүгә, АПКда бизнес алып баруның иң яхшы тәҗрибәләрен үстерүгә һәм алга этәрүгә юнәлдерелгән.

«Фермер мәктәбе " проекты ярдәмендә Татарстан Республикасында яңа эш урыннары гына булдырылып калмыйча, җирле базарда кирәкле сыйфатлы фермер продукциясенең яңа брендлары да барлыкка киләчәк, - дип билгеләп үтә «Россельхозбанк» АҖнең Татарстан төбәк филиалы директоры Ләлә Кудерметова. - Курс Авыл хуҗалыгы министрлыгының төбәк брендларын алга этәрү программасы белән синхронизацияләнде, һәм без студентларыбызны "сөт-ит терлекчелеге", "кошчылык" юнәлешләре буенча эшләргә өйрәтәчәкбез».

Конкурс сайлап алуында катнашу өчен 12 гыйнвардан 27 гыйнварга кадәр "сөт-ит терлекчелеге" яки "кошчылык" юнәлеше буенча презентация яки видеоролик әзерләргә һәм тутырылган гариза белән бергә электрон почтага җибәрергә кирәк: sh.fermer_rt@mail.ru конкурс турында Нигезләмә һәм башка документлар белән тулырак министрлык сайтында танышырга мөмкин.

Һәр катнашучыдан бары тик бер проект кына тәкъдим ителергә мөмкин. Конкурс материаллары Эксперт жюри утырышларында каралачак. Җиңүчеләр "фермер хуҗалыгы агробизнесы" ("Агробизнес фермер хуҗалыгы") 252 сәгатьлек һөнәри яңадан әзерләү программасы буенча бушлай укуга сертификатлар алачаклар, грант ярдәме алу өчен билгеләнгән үрнәктәге диплом биреләчәк.

Шулай ук агросәнәгать комплексының алдынгы предприятиеләрендә һәм Татарстанның иң яхшы фермер хуҗалыкларында стажировка узу, программада катнашучыларны алга таба озата бару һәм аларга ярдәм итү чаралары каралган. Укулар 2021 елның 24 февраленә планлаштырылган.