Муниципаль идарә компанияләрен оештыру турындагы карарга кул куелды.

Әлеге оешмалар чаллылыларга күп фатирлы йортлар белән идарә итүдә, төзекләндерүдә һәм тиешле тәртиптә тотуда, шулай ук коммуналь хезмәтләр күрсәтүдә ярдәм итәчәкләр. Ә мөлкәт хуҗалары һәм ресурслар белән тәэмин итүче оешмалар белән хезмәттәшлек килешү нигезендә алып барылачак.

Яңа гына оешкан компанияләр хакимият биналарында урнашыр дип көтелә. Бүген идарә компанияләренең учредитель документлары һәм уставлары федераль хезмәтләрнең территориаль органнарында, прокуратурада тикшерү үтә.

Торак-коммуналь хуҗалыгындагы һәр яңалык, иң беренче чиратта, халыкның яшәешен яхшыртуга юнәлтелергә тиеш. Идарә компанияләренең артуын да коммуналь хезмәтләр күрсәтүнең сыйфатында уңай чагылыш табар дигән өмет белән бәйләргәдер.