-33 градуслык салкыннар килә

Чәршәмбе, 14 февральдә, төбәк Скандинавиядән Россиянең Европа территориясенә күчәчәк чираттагы антициклон йогынтысына эләгәчәк. Атмосфера басымы шактый артачак, явым-төшем тукталачак, температура фоны сизелерлек түбәнәячәк (нормадан 9-14 градуска түбәнрәк дәрәҗәгә кадәр). Антициклон монда 17 февральгә кадәр хакимлек итәчәк. 

14 февральгә каршы төндә -18, -23 градуска кадәр, урыны белән -27 градуска кадәр суыта, ә көндез -12 градустан -17 градуска кадәр көтелә. Пәнҗешәмбе, 15 февраль көнне, төнлә һәм иртән -22дән -27 градуска кадәр, урыны белән -30 градуска кадәр фаразлана. Көндез -16, -21 кадәр җылыта.

Метеорологларның беренчел мәгълүматларына караганда, җомга һәм шимбә көннәрендә, 16 һәм 17 февральдә, Татарстанда тәүлекнең караңгы вакытында -25... -30 градуска кадәр, ә түбән урыннарда -33 градуска кадәр салкын булачак.