Балаларны беренче сыйныфка алу өчен гаризалар кабул итә башлыйлар

Башкарма комитетның мәгариф идарәсе башлыгы Рөстәм Хуҗин беренче сыйныфларга балаларны кабул итүнең регламент буенча башкарылуын әйтте. 

– Мәгариф учреждениеләре беренче сыйныфтагы урыннар саны турындагы мәгълүматны үзләренең сайтларына урнаштыралар. Кабул итү 30 мартта башлана. Документларны электрон рәвештә дә, илтеп бирергә дә була. Ыгы-зыгы булыр дип уйламыйм. Дөрес, кайбер мәктәпләргә укырга керүчеләр күп, кайберләренә аз. Әмма һәр мәгариф учреждениесе мөмкинлегеннән чыгып, укучыларны кабул итә, – диде ул матбугат конференциясендә. 

Рөстәм Ниязович 34нче бистәдәге һәм «Притяжение» торак комплексындагы яңа мәктәпләрнең дә җәй көне укучылар кабул итәчәген әйтте. 

– Төзелеш дәвам итә. Шул ук вакытта җитәкчеләрне раслау, юридик затка исәп-хисап ачу эшләре бара. Әлеге эшләр тәмамлангач, яңа мәктәпләргә дә укучылар кабул итү башлана, – дип искәртте ул.