Бөтенроссия «Ак калфак» бәйгесендә Чаллы кызы җиңү яулады

VI Бөтенроссия "Ак калфаклы укучы кызлар" бәйгесендә Чаллы кызы, М.Вахитов исемендәге 2нче гимназиядә белем алучы Айсылу Ишалина җиңү яулады.

Ул - уку алдынгысы. Республикакүләм олимпиадаларда 5нче сыйныфтан бирле катнаша. Биш ел эчендә 2 тапкыр олимпиада җиңүчесе, ике тапкыр призер булган. Моннан тыш, гимназиядә оештырылган «Кәеф» вокал-инструменталь ансамбленә йөри. «Татар сүзе», «Җәлил укулары» кебек нәфис сүз бәйгеләрендә дә финалист булган кыз.  

Исегезгә төшерәбез, "Ак калфаклы укучы кызлар" бәйгесен «Ак калфак» татар хатын-кызлар оешмасы  «Бөтендөнья татар конгрессы» белән берлектә оештыра.  Аның максаты - татар халкы тарихын өйрәнү, рухи һәм мәдәни кыйммәтләрне үстерү, милләт, туган илгә карата мәхәббәт хисе тәрбияләү, алдынгы, актив укучыларны барлау.