Быел 3 мең бала «Цифрлы икътисад» проекты буенча мәгълүмати технологияләрне өйрәнәчәк

Татарстанда «Цифрлы икътисад» илкүләм проектын гамәлгә ашыру 55 Яндекс-Лицей һәм 65 IT-сыйныф ачарга һәм быел ук берничә мең баланы мәгълүмати технологияләр нигезләренә укытырга мөмкинлек бирәчәк. Кешеләрнең белемнәрен күтәрергә, яшь буынны цифрлы икътисад шартларында тәрбияләргә «Цифрлы икътисад өчен кадрлар» федераль проекты ярдәм итә.

2020 елда 1 мең бала — Яндекс-Лицейда, ә 900 бала «IT-академия» курсларында укыячак. Моннан тыш, 500 бала «IT-cube» үзәгендә заманча компьютер технологияләре һәм робототехника серләрен үзләштерәчәк. «Школа 21» проекты да 500 баланы укырга кабул итәчәк.

Өлкәннәр дә белемнәрен арттырачак. 2020 елда 9 929 студентны цифрлы икътисад өлкәсендә төп компетенцияләр буенча әзерләп чыгарачаклар. Өстәмә белем бирү программасы кысаларында республикада тагын 13 мең кешене шундый ук компетенцияләргә өйрәтәчәкләр. Шулай ук Татарстанда 7 эре хакатон үткәрергә һәм мәгълүмати технологияләр өлкәсендә 150 грант оештырырга планлаштырыла.

Бүгенге көндә Татарстан «Цифрлы икътисад» илкүләм проектын һәм шул юнәлештәге «Мәгълүмати инфраструктура», «Мәгълүмати куркынычсызлык», «Цифрлы технологияләр», «Цифрлы дәүләт идарәсе», «Цифрлы икътисад өчен кадрлар» кебек биш федераль проектны тормышка ашыру буенча алдынгы төбәкләрнең берсе булып тора.

2019 елда проект кысаларында 1 мең кеше «Шәхси цифрлы сертификатлар» программасы буенча укыган иде. Шулай ук 520 дәүләт хезмәткәре CDO программасы буенча квалификациясен күтәрде, 500 кеше «Акыллы шәһәр» программасы буенча укыды.

Киләчәктә 2024 елга кадәр татарстанлыларның цифрлы икътисад өлкәсендәге грамоталылыгын арттыру, халыкның 40 процентын цифрлы хезмәтләр белән кулланырга өйрәтү максаты куелган. Талантлы яшьләргә ярдәм итү өчен махсус программа һәм проектлар гамәлгә ашырылачак, шул исәптән — IT-олимпиадалар оештыру, белем бирү грантлары булдыру, мәгълүмати технологияләр буенча белгечләр әзерләүче югары уку йортларында урыннар санын арттыру.

Чыганак: Татар информ