Чаллы балыкчылары гомерләрен куркыныч астына куя

Бу һәм алдагы атналарда синоптиклар +7..+10 градус фаразлый. Боз өсте ныклыгын югалта, балык тоту куркыныч, дип кисәтә МЧС хезмәткәрләре. Кама, Мәләкәс елгаларында инде боз ярылды. Су калкып чыккан урыннар да бар. Боз калынлыгы 25-30 см-ны тәшкил итә. 

"Бозның калынлыгы түгел, аның структурасы курку уята. Ул көннән-көн үзгәрә. Аеруча Түбән Кама ГЭСының түбән бьефында куркыныч. Анда су чыккан урыннар күп. Тик балыкчыларның моңа исе китми. Биредә көн саен 20-30 кеше балык тота, гомерләрен куркыныч астына куялар", - ди МЧС инспекторы Зиннур Мостафин. 

МЧС хезмәткәрләре балыкчыларны кисәтү максаты белән көн саен рейдлар оештыра. Балыкчылар гына сезонны ябарга ашыкмый.  

Фотолар ТР МЧС хезмәтенең Чаллыдагы бүлегеннән алынды