Чаллы бюджет акчалары нәрсәгә тотылачак?

Шәһәр Советы депутатлары 2024 елга Чаллы бюджетын раслады. Керемнәр 17 млрд 688 млн 430 мең сумны тәшкил итә. Моннан тыш, узган елдан 500 млн 962 мең сум күләмендә акча калган. 

205 млн сум муниципаль учреждениеләр белгечләренә өстәмә түләүгә, 22 млн сум Җиңү көнен һәм Сабантуй бәйрәмен билгеләп үтүгә, 24 млн сум шәһәрне баннер, әләм (флаг) белән бизәүгә тотылачак. Шулай ук махсус хәрби операциядә катнашучы ир-атларның балаларын, күпбалалы гаиләдә тәрбияләнүче физик мөмкинлекләре чикле балаларны бушлай ашату өчен 37 млн сум бүленеп биреләчәк. 

60 млн сум муниципаль учреждениеләрне төзекләндерүгә, 35 млн сум урамнарда заманча яктырткычлар урнаштыруга, 50 млн сум пассажирлар йөртүгә тотылачак.