Чаллыда ир-атны банк картасы өчен хөкем иттеләр

Җирдә яткан кеше әйбере әле синеке дигән сүз түгел. Әмма 43 яшьлек ир-ат башкача фикердә була, күрәсең. Урамда табып алган банк картасын ул рәхәтләнеп кулланырга карар кыла. Шәһәр кибетләренә кереп, 6 мең сумлык товар ала. Карта хуҗасы, SMS-белдерүләр килә башлагач кына, эшнең нидә икәнен төшенә һәм хокук сакчыларына мөрәҗәгать итә. 

Гаепләнүче эзенә бик тиз чыгалар. Ул моңа кадәр дә берничә тапкыр хөкем ителгән булган. Беркайда да эшләми. Аңа карата җинаять эше кузгатылды. Суд утырышы булачак. Ир-атка 6 елга кадәр ирегеннән мәхрүм ителү яный.