Чаллы 9 Май бәйрәменә әзерләнә

«Мәгариф учреждениеләрендә, районнарда Бөек Җиңүнең 77 еллыгын бәйрәм итү уңаеннан, Бөек Ватан сугышы ветераннарын зурлау белән 669 чара үткәрү планлаштырыла», - дип хәбәр итте Башкарма комитет җитәкчесе урынбасары Рамил Хәлимов.

Шуларның иң әһәмиятлеләре:

- Шәһәр укучылар советы депутатлары инициативасы белән үткәрелә торган «Моя семья причастна к той Победе» акциясе;

- «Лучший часовой Поста № 1» шәһәр конкурсы;

- ветераннар хоры һәм тимурчылар отрядлары белән берлектә «Голубой трамвай» акциясе;

- бишенче ел рәттән шәһәрдә «Поющие Челны» акциясе үткәрелә, аның барышында мәктәп хорлары сугыш еллары җырларын башкаралар;

- «Ветеран живет рядом» акциясе кысаларында тимурчылар отрядлары ветераннар янына йөри;

- быел «Письмо ветерану» акциясе старт алды, анда укучылар актив катнаша.

18-25 апрель көннәрендә Яр Чаллы шәһәрендә «Язгы игелек атнасы-2022» шәһәр иреклелек марафоны узды.  2022 елның 7 апреленнән 18 маена кадәр «Заман» яшьләр үзәге тарафыннан, укучылар өчен, Бөек Ватан сугышында Җиңүнең 77 еллыгына багышланган, «Бөек Җиңү битләре» дигән тарихи интеллектуаль уен үткәрелә.

18 апрельдән 9 майга кадәр шәһәрнең эшче яшьләре балалары арасында Бөек Җиңүнең 77 еллыгына багышланган «Память. Дети» видеопроекты тормышка ашырыла (53 видеоролик социаль челтәрләрдә урнаштырылган).

22 апрельдән башлап шәһәрдә «Георгий тасмасы» акциясе үткәрелә.

6 май көнне Яр буе паркы мәйданында Мариин театрының симфоник оркестры, дирижер Валерий Гергиев чыгыш ясаячак.

7 май көнне Җиңү паркында тынлы оркестрлар фестивале узачак.

«Бөек Ватан сугышында Җиңүнең 77 еллыгына багышланган чаралар лаеклы үтсен өчен барысын да эшләргә кирәк», - дип билгеләде шәһәр мэры Наил Мәһдиев.