Чаллы коллективлары Мәскәүдә Сабан туе оештыра

Чаллы делегациясе Мәскәү Сабан туенда "Туган авылым" мәйданчыгы оештыра, ул XX гасыр башындагы татар крестьян хуҗалыгын күрсәтә. Табигый ишегалды корылмалары белән агач йорт урнаштырылачак. Биредә шулай ук тире остасы, кәрзин остасы эшен күрергә, себерке бәйләргә, он иләп карарга мөмкин булачак. Теләгән кеше һөнәрчеләр ярминкәсендә татар халкының декоратив-гамәли сәнгате эшләнмәләрен сатып ала, татар кухнясының традицион ризыкларын авыз итә алачак.

Бәйрәм кунаклары өчен чаллылылар "Аулак өй" (традицион уеннар, ярышлар, җырлар һәм биюләр белән яшьләр утырмалары) театральләштерелгән тамаша әзерләгән. 11: 00дән 16: 00 сәгатькә кадәр Яр Чаллы шәһәренең "Без бит Чаллылылар" кече концерт мәйданчыгы эшләячәк һәм параллель рәвештә шул вакыт арасында халык уеннары һәм ярышлары узачак (капчык киеп йөгерү, чүлмәк вату, күз бәйләп призлар кисү, капчык белән көрәш, балык тоту, йомырка куелган кашык кабып йөгерү, милли көрәш һәм башкалар).

Традиция буенча "Сабантуй-2019" концерт мәйданчыкларында эстрада йолдызлары, җыр һәм бию коллективлары чыгыш ясаячак. Фестиваль кунаклары – Айдар Галимов, Эльмира Кәлимуллина, Роберт Юлдашев, Альберт Җәләлов, Элвин Грей, Бабек Мамедрзаев, Кирилл Мойтон һәм Elvin Grey лейблы артистлары катнашачак.

http://nabchelny.ru/news/37127