Чаллы спортчысы тхэквандо буенча Халыкара турнирда җиңү яулады

Чаллы спортчысы Анна Казарновская Төркия Президенты Кубогына үткәрелгән G-2 Халыкара турнирында җиңү яулады. Бу хакта ТР «Динамо» физкультура-спорт җәмгыяте матбугат хезмәте хәбәр итә.
Тхэквандочылар ярышы 7-12 февраль көннәрендә Төркиянең Анталия шәһәрендә узды.
«Тренер Сергей Титкинда шөгыльләнүче Анна Казарновская турнирның икенче көнендә, 52 килограммга кадәрге үлчәү категориясендә җиңүче булды», - дип искәрттеләр матбугат хезмәтендә.
Әлеге үлчәү категориясендә Россия спортчылары аеруча зур уңышка иреште. Ростов вәкиле Анастасия Космычева – көмеш, Липецкидан Ирина Мещерякова һәм Чиләбедән Анна Гыйльманова бронза медальләргә лаек булды. 

https://tatar-inform.tatar/news/2019/02/12/180650/