«Чаллыда багана бик шома»

Чаллы Сабантуена республикабызның башка шәһәрләреннән дә кунаклар күп килгән. 
Игезәкләр Александр белән Юрий Муравьевлар Яшел Үзәннән милли уеннарда катнашыр өчен килгәннәр. Алар баганага менү буенча чемпионнар. 

- 20 елдан артык Сабантуйның бу уеныныда катнашабыз. Республикабызның бик күп шәһәрләрендә булдык, гел призлы урыннар яулыйбыз. Былтыр Чаллыда 3нче урынны алдым, спорт кибетенә 6 мең сумлык сертификат оттым. Моннан тыш тәкә, әтәч, бик күп көнкүреш техникаларын оттык. Быел да көчебезне сынап карар өчен килдек, - диләр Александр белән Юрий. 

Баганага менү жирәбә буенча башкарыла. Юрийның чираты беренче җитте. Ул әз генә менде дә кире төште. 
- Багана бик шома, менеп булмый, - диде ул.  

Илгизәр Сафинга 59 яшь. Ул 15 елдан артык баганага менә. Бүген дә җиңү яулар өчен килгән. 
- Яшьләр белән ярышырга яратам. Чаллыда биш тапкыр җиңүче булдым. Телевизор, диван, микродулкынлы пич отканым булды. Бер елны спорт кибетенә сертификат бүләк иттеләр, шул акчага көймә алдым, күңелемне тынычландырдым, - ди ир-ат.
Бүген ул багананың яртысына кадәр менде дә кире төште.
- Быел баганага штукатурка сылаганнар, ул бик шуа,  менеп булмый, хәл бетә. Астагы өлешенең диаметры да киң, тотынып булмый, - диде Илгизәр абый. 

Багана башына менәргә теләүчеләр күп булды, алар арасында хытын-кызлар да бар иде. Багананың биеклеге 23 метр. Беркем дә менә алмас шикелле тоела, ул шундый биек. Тик шулай да утыз кеше арасыннан Рөстәм Хөсәенов багана башына менә алды. 
- Мин тугыз ел бу уенда катнашам, гел 2-3нче урыннар ала идем, соңгы өч елда менмәдем. Быел көчемне сынап карарга булдым. Баганага менү нык авыр, 5-6 метр менәсең дә, хәлсезләнәсең, аска таба шуа башлыйсың, багана бик шома. Өскә менеп җитәргә 6 метр калгач, аңымны җуя башладым. Ләкин монда хәтле менеп җиткәч,  бөтен көчемне җигеп, көчкә ахырына кадәр барып җиттем, - диде Рөстәм.
Рөстәм бер минут 30 секунд эчендә менде. Төшкәч, бик озак хәл җыеп утырды.