Чаллыда торакка ихтыяҗ бар

Быел Чаллыда 320 мең квадрат метр торак куллануга тапшырылырга тиеш. Беренче яртыеллыкта 170,6 мең квадрат метры тапшырылган, шул исәптән 7 мең кв. м. индивидуаль торак төзелеше буенча. Бу гомуми еллык планның 53 процентын тәшкил итә.
Шәһәрдә 15 төзүче оешма  күп фатирлы йортлар төзү белән шөгыльләнә.
– Яңа торакка ихтыяҗ узган еллар дәрәҗәсендә саклана. Моңа яңа төзелә торган йортларда ташламалы ипотека буенча дәүләт программасы да ярдәм итә. Ул гражданнарга һәм төзелеш тармагына ярдәм йөзеннән башланган иде.  Бүген программа 2022 елның 1 июленә кадәр озайтылды, еллык процент ставкасы - 7%,  кредит буенча лимит - 3 млн.сум. Шәһәрдә яшәүче бер кешегә 24,3 кв.м туры килә, республика буенча бу күрсәткеч – 27,8 кв. метр”, – диде Башкарма комитет җитәкчесе урынбасары Илмир Исхаков.
2020 елның 1 июленнән социаль ипотека буенча торак алу мөмкинлеге барлык яшь гаиләләргә, шул исәптән коммерция, бюджеттан тыш оешмаларда һәм предприятиеләрдә эшләүче, шәхси эшмәкәрләргә һәм үзмәшгульләргә бирелә.
Яр Чаллы шәһәрендә әлеге мөмкинлектән 119 гаилә файдаланган. Шуларның 34е инде  63/21, 63/23 йортларында фатир алган. Калган гаиләләр ел ахырына кадәр төзелеп килүче 63/16, 63/20 йортларда фатирлы булачак. Теләк белдерүчеләрдән гаризалар җыю һәм исәпкә кую дәвам итә. Башкарма комитетның торак үсеше бүлегендә консультация алырга һәм гариза язарга мөмкин.

Фото: http://nabchelny.ru