Дания Хәмидова: “Җиңүне максат итеп куйдык”
Үткән атнада КАМАЗ мәдәният үзәгендә яүсмерләр арасында шаяннар һәм тапкырлар клубының ( ШТК - КВН) өченче сезонын ачуга багышланган фестиваль үтте. Мәгариф һәм яшьләр белән эшләү идарәсе һәм "ТАТАR PRODUCTION" еvent-агентлыгы оештырган фестивальдә шәһәр мәктәпләреннән 40тан артык команда татар һәм рус лигасында көч сынашты. Татар телле командалар арасында - 29нчы...
Үткән атнада КАМАЗ мәдәният үзәгендә яүсмерләр арасында шаяннар һәм тапкырлар клубының ( ШТК - КВН) өченче сезонын ачуга багышланган фестиваль үтте. Мәгариф һәм яшьләр белән эшләү идарәсе һәм "ТАТАR PRODUCTION" еvent-агентлыгы оештырган фестивальдә шәһәр мәктәпләреннән 40тан артык команда татар һәм рус лигасында көч сынашты. Татар телле командалар арасында - 29нчы гимназия, рус командалары арасында А.С.Пушкин исемендәге 78нче лицей командалары Гран-прига лаек булдылар. Фестивальдән соң без татар командалары арасында тиңе булмаган "Шайтан таяклары" командасы җитәкчесе Дания Бәхтияр кызы Хәмидова белән әңгәмә кордык.
- Дания, Гран-при алуыгыз белән котлыйм. Ялгышмасам, "Шайтан таяклары" үткән сезон финалында да шундый югары дәрәҗәгә ия булган иде. Шул биеклектә калу өчен шактый тырышырга туры килгәндер, чөнки команда әгъзаларыгыз да "яшьләр -яшелләр" бугай.
- Әйе, быел яңа команда белән уйныйбыз. Сентябрь башында былтыргы состав уенчылары белэн "кастинг" үткәрдек - теләге булган һәр укучыга үзенең сәләтен күрсәтү мөмкинлеге бирдек. Сайлап алуда 5нче сыйныфлар җитез, кыю булулары белән аерылып тордылар, уйнарга теләкләре дә зур иде. Шулардан команда төзедек. Быелгы состав яңа булуга карамастан, дәрәҗәне төшермәскә, дигән максат куйдык. Миңа былтыргы команда уенчылары бик булыша. Дәресләре тәмамлануга (хәзер алар башка уку йортларында белем ала) вакытларын кызганмый, гимназиягә киләләр. Балалар яшүсмерләр үзәгенә (ДЮЦ) редактурага да (номерларны күрсәтү) бергә йөрибез, мәзәкләрне дә бергә язабыз.
- "Шайтан таяклары"ның капитаны да яңа бугай. Йөзе таныш, командада берничә ел уйный күрәсең.
- Әйе, капитаныбыз яңа. Хәсәнов Марат - мәктәпнең укучылар советы спикеры, 10нчы класс укучысы. Былтыргы сезонның капитаны Саетгалиев Илнур - чын мәгънәсендә осталарның остасы, 9нчы сыйныфтан соң гимназиядән китте, быел студентлар лигасында уйный.
- Арада иң шәп уенчыларыгызда бардыр.
- Иң шәп уенчыларыбыз икәү - Галләмов Айназ һәм Фәррахов Айдар. Алар арада иң тәҗрибәлеләр дә, чөнки былтыр ярым финалда һәм финалда уйнадылар. Алар исәбендә инде ике Гран-при. Айназ һәр яклап сәләтле: "Созвездие-Йолдызлык", "Татар малае" һәм башка бик күп конкурсларда җиңү яулаган бәләкәй йолдызыбыз.
- Дания, фестивальдә ничә команда катнашты, көндәшләрегез көчле идеме?
-2015-2016нчы елнын сезонын ачуга багышланган фестивальдә барлыгы 43 команда катнашты, татар телендә уйнаучы командалар җидәү иде. Әлбәттә, көндәшләр көчле, чөнки алдагы сезоннарда да шушы ук составта уйнаган командалар бар. Билгеле, алар чыныккан һәм тәҗрибәле. Ләкин КВН уенчылары сәхнәдә генә бер-берсенә көндәш. Сәхнә артында алар бөтенесе бер гаилә кебек. Бер-берсенә таяныч, һәрчак ярдәм күрсәтергә әзер.
- Сезнең өчен уенның иң авыр мизгеле кайсы?
- Редактура дисәм ялгышмамын. Чөнки ДЮЦта тәҗрибәле уенчылар безнең әзерлекне, мәзәкләрнең кызыклылык дәрәҗәсен, яңалыгын һәм сәхнәдә куелышын бәялиләр. Алар бездән оста, тамашачыга нәрсә ошаганын беләләр, шуңа күрә остазларның бәяләве һәм тәкъдимнәре безгә бик мөһим. Кайвакыт редактурадан соң биш мәзәктән берсе генә кала. Яңаларын бер көндә язарга, иң яхшыларын сайлап уйнарга кирәк. Уенда тагын шунысы шарт: сәхнәгә чыккач, командаңны оятка калдырмаслык итеп, үз ролеңне җиренә җиткереп, кызык итеп уйнау мөһим. Команданың уңышы - һәр уенчыга бәйле бит. Микрофонны дөрес тоту, сәхнә этикеты, югалып калмау, тамашачының игътибарын яулау җиңел эш түгел.
- Җиңүгә өметегез зур идеме? Бүләкләр...
- Һәр команда да уенга җиңү өмет итеп киләдер. Былтыргы чемпионнар буларак без өметләндек кенә түгел, җиңүне максат итеп куйдык һәм шуңа ирештек тә. Жюри әгъзалары нәтиҗәләрне әйткәндә, күңелдәге хис-тойгыларны аңлатып бетерерлек булмады. Ә инде, "Гран-при 29нчы гимназиянең "Шайтан таяклары" командасына бирелә!" дигәч, шатлыгыбыз эчебезгә сыймады. Бүләккә килгәндә, ул - "ТАТАR PRODUCTION" агентлыгыннан 2000 сумлык сертификат һәм иң зур бүләк - онытылмаслык мизгелләр.
- Дания, КВН командасы җитәкчесе булу гади вазифа түгел. Сез килүгә, "Шайтан таяклары" бик тиз үсә башлады: икенче сезон финалында Гран-прига лаек булуы - шуның дәлиле.
- Команданы былтыр гына җитәкли башласам да, тормышымда КВН инде күптәннән: 8нче сыйныфта укыганда шөгыльләнә башлаган идем. Гали Акыш исемендәге 84нче лицейның "Оба-на" командасы составында 4 ел уйнадым, 2009 елда "Мисс КВН" титулына лаек булдым. Шуңа күрә КВН җитәкчесе булу миңа оештыру ягыннан авыр түгел. Ә менә эмоциональ яктан җиңел димәс идем: командам сәхнәдә чакта бик дулкынланам, йөрәгем күкрәк читлегеннән сикереп чыгар хәлгә җитәм. Ләкин җиңгәннән соң күңелдә туган хисләр, балаларның һәм үземнең бәхетле күз яшьләре барлык авырлыкларны оныттыра. Әлбәттә, мәзәкләр һәм миниатюралар язганда баш "шартлый", чөнки гел яңа мәзәкләр кирәк, аларны карап тамашачы көлерлек булырга тиеш. Былтыргы уенчыларымның ярдәме зур. Яңа уенчыларны да мәзәкләр язу осталыгына өйрәтәбез.
Гимназия җитәкчелеге дә миңа һәм командага зур таяныч һәм терәк. Җиңүләребездә директорыбыз Нәркиз Венер улы Кашаповның, директорның тәрбия эшләре буенча урынбасары Венера Ислам кызы Хөсәенованың, педагог-оештыручы Эльвира Рөстәм кызы Харисованың өлешләре зур. Аларга чиксез рәхмәтлебез.
- 2015-2016 уку елының КВН уеннары башлана гына әле. Алда "Шайтан таяклары"н чирек, ярты финал һәм финал уеннары көтә. Яңа җиңүләр юлдаш булсын сезгә.
- Рәхмәт, уеннарга көтеп калабыз.
Әңгәмәдәш Илгизә ЛОТФУЛЛИНА.
Следите за самым важным и интересным в Telegram-каналеТатмедиа
Нет комментариев