"Калфаклы бәйге" фотоконкурсы хатын-кызлары өчен тавыш бирү башланды

"Шәһри Чаллы" газетасы игълан иткән "Калфаклы бәйге"нең иң кызыклы, кызу этабы - тавыш бирү башланды! Газетаның инстаграм аккаунтында подписчикларыбызга калфак кигән фотоларын җибәрергә тәкъдим иттек. Шөкер, катнашырга теләк белдерүчеләр бик күп булды. Ике атна дәвамында Директка һәм WhatsApp буенча 89083330370 номерына 40тан артык фото килде. Күпчелеге - Чаллы, Тукай районыннан. Казан, Алабуга, Азнакай шәһәрләреннән, Актаныш, Минзәлә, Кукмара, Теләче, Әтнә, Кайбыч районнарыннан, Башкортстанның Чакмагыш районыннан, хәтта Мәскәүдән дә калфак кигән туташ-ханымнар үз фотоларын җибәрде. Иң яшь катнашучыга нибары 10 ай, иң өлкәненә - 84 яшь. Күңелегезгә хуш фото өчен сайтыбызда 25 июль 20 сәгатькәчә тавыш бирергә мөмкин. Моның өчен фото астындагы "проголосовать" дигән төймәгә басарга кирәк. 27 июль көнне бәйгегә йомгак ясыйбыз. Безнең белән калыгыз!