Камада гадәттән тыш хәл

Һәлакәт Чулман елгасының Тарловка һәм ГЭС бистәсендәге "Су анасы" пляжлары арасындагы дугада була. Кичке 4ләр тирәсендә ярдан 5 км эчтәрәк бер кешенең ярдәм сорап кычкырганы ишетелә. Денис исемле ир-ат йөзә торган тактасына басып (сапборды) тавыш ишетелгән урынга юнәлә. Коткаручылар килгәнче алар суда сапбордка тотынып тора. Шул рәвешле 45 яшьлек шәһәрдәшебез  2 кешене үлемнән алып кала.

Соңыннан билгеле булганча, 24 һәм 26 яшьлек егетләр салмыш килеш суга керәләр һәм кабартылган матрас белән Чулман буйлап йөзеп китәләр. Бәхеткә, аларны вакытында коткаралар, медицина ярдәме кирәк булмый. Өч ир-атны да ярга ГИМС хезмәткәрләре һәм коткаручылар алып чыга.