«КАМАЗ-Мастер» узышчылары балалар өчен спектакль куйды

Данлыклы «КАМАЗ-Мастер» узышчылары базасында мобилизацияләнгән шәһәрдәшләребезнең балалары өчен бәйрәм чарасы үтте. Аны команданың җитәкчесе Владимир Чагин оештырды. Биредә малайлар һәм кызлар өчен экскурсия үткәрделәр. Аның барышында узышларда катнашучы КАМАЗ машиналарын күрсәттеләр, легендар коллективның казанышлары хакында сөйләделәр. 

Моннан тыш, «КАМАЗ-Мастер» узышчылары үзләренең гаилә әгъзалары белән берлектә, балалар өчен театральләштерелгән тамаша да күрсәтте. Кичәнең төп геройлары Кыш бабай һәм Кар кызы исә кечкенәләрне Яңа ел күчтәнәчләре белән сөендерде.