Шəhри Чаллы

Кәгазь кенәгәләргә көн бетә

РФ Саклык банкы башлыгы Герман Греф гамәлдәге кәгазь хезмәт кенәгәләрен электрон вариантларга алыштырырга кирәк дип белдерде. "Кенәгәләрнең бүгенге рәвеше оешмаларга да, гражданнарның үзләренә дә, Пенсия фондына да уңайлы түгел. Кенәгәне кулдан тутыруга әллә никадәр вакыт һәм чыгым китә. Әгәр югала калса, гомумән, күпме мәшәкать тудыра", - дигән ул.

Моның белән РФ Хезмәт министрлыгында да килешәләр, шулай ук күп кенә экспертлар да бүгенге кәгазь хезмәт кенәгәләрен уңайсыз дип саный. "Хезмәт кенәгәләре, чыннан да, инде үткән калдыгы, искергән күренеш. Алар белән эш итү вакытны күп ала. Хәзер бөтен җирдә дә мәгълүмат электрон формага күчеп бара", - ди танылган эксперт А.Алисенов. Аның фикеренчә, әгәр бу яңалык тормышка ашса, бөтен ил буенча документлар әйләнеше һәм аларны саклауда чыгымнар нык кимер иде, шулай ук электрон кенәгәләр кәгазеннән ышанычлырак та булачак.

Дөрес, кайбер белгечләр, әлеге дә баягы хакерлар һөҗүм итә калса, электрон хезмәт кенәгәләрендә сакланучы мәгълүматлар бөтен халык өчен ачылыр дип шикләнәләр.

Ә менә профсоюзлар мондый алыштыруга каршы икән. Бу хакта Русиянең бәйсез профсоюзлар федерациясе башлыгы М.Шмаков белдергән. "Электрон кенәгәләргә күчкәндә аның бер үк вакытта кәгазе дә тутырылырга тиеш. Ник дигәндә, бер-бер хәл чыгып, интернеттагы бу мәгълүматлар югала калса, кеше пенсиягә чыкканда үзенең кайларда эшләгәнен дәлилли алмаячак", - дигән ул.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: