Коммерцияле булмаган оешмалар өчен субсидияләр бирү буенча конкурска гаризалар кабул ителә

23 августка кадәр ТР Икътисад министрлыгында Социаль әһәмияткә ия проектларны гамәлгә ашыручы коммерциягә карамаган оешмаларга Татарстан Республикасы бюджетыннан субсидияләр бирү буенча конкурска Татарстан Республикасы коммерцияле булмаган оешмаларыннан гаризалар кабул ителә. Конкурс ике юнәлеш буенча үткәрелә: 1) гражданлык җәмгыяте институтларын һәм гражданлык инициативаларын үстерү, 2) гражданнарның тормыш сыйфатын күтәрү өчен шартлар тудыру. Әлеге юнәлешләр кысаларында конкурс түбәндәге номинацияләр буенча үткәрелә: җәмгыятьтә коррупцион тәртипкә каршы торучанлыкны формалаштыру; хәйриячелек һәм иреклелек үсеше, яшьләрне патриотик тәрбияләү; гражданлык бердәмлеген һәм милләтара, конфессияара татулыкны ныгыту; коммерцияле булмаган оешмалар эшчәнлегенең иң яхшы тәҗрибәләрен ачыклау, уңышлы социаль технологияләр тарату; иҗтимагый һәм сәяси мәсьәләләр буенча фикер алышканда гражданлык компетенцияләрен, күнекмәләрен һәм гореф-гадәтләрен үстерү; Татарстан Автономияле Совет Социалистик Республикасы оешуга 100 ел тулуга багышланган чаралар үткәрү, муниципаль берәмлекләрнең иҗтимагый-мәдәни киңлеген үстерү, ял сыйфатын һәм мәдәни байлыкларның һәркем өчен мөмкин булуын арттыру, туризм һәм кунакчыллык өлкәсен үстерү; актив озын гомерлелек өчен шартлар тудыру; массакүләм спортны, шул исәптән физкультура-сәламәтләндерү һәм спорт эшчәнлегенең инклюзив формаларын үстерү һәм сәламәт яшәү рәвешен популярлаштыру; өстәмә һәм цифрлы белем бирүне, фәнни-техник һәм сәнгать иҗатын үстерү; өзлексез экологик белем бирү һәм халыкны агарту системасын үстерү.

Конкурста закон белән билгеләнгән тәртиптә теркәлгән һәм Татарстан Республикасы территориясендә үз оештыру документлары нигезендә «коммерцияле булмаган оешмалар турында» Федераль законның 31.1 маддәсе нигезендә каралган эшчәнлек төрләрен конкурс игълан ителгән көнгә кадәр кимендә бер ел башкаручы коммерцияле булмаган оешмалар катнаша ала. Конкурста катнашу өчен претендент үзе яки аның ышанычлы заты кәгазь һәм электрон формада, Татарстан Республикасы дәүләт һәм муниципаль хезмәтләр Порталы аша электрон формада гариза бирә яки «конкурска» тамгасы белән почта аша 420021, Казан шәһәре, Мәскәү урамы, 55 йорт, 106 кабинет адресы буенча җибәрелә.

Конкурс турындагы тулырак мәгълүмат белән биредә танышырга була.

http://nabchelny.ru/news/37271