Мобиль бригадалар COVID-19дан вакцинация ясау өчен Чаллы предприятиеләренә йөриләр

Предприятие яки оешма вакцинация узарга теләүчеләрне барларга һәм территориаль поликлиника белән элемтәгә керергә тиеш. Оештыру мәсьәләләренә җаваплы затны билгеләү мөһим. Алга таба поликлиниканың медицина хезмәткәре компания вәкиле белән элемтәгә керәчәк, вакцинация үткәрү датасын һәм вакытын билгеләячәк.
Вакцинация үткәрү өчен барлык шартлар да тудырылырга тиеш. Пациентны карау һәм теркәү өчен махсус урын оештырылачак.
"Вакциналаштыру өчен чиста офис бинасы, медицина пункты туры килә. Медиклар бригадасы оешмада COVID-19дан прививканы ясарга теләүче 50-70 кеше булса, аларның эш урынына баралар. Вакцина махсус суыту җиһазларында саклана. Салкын режим иммунобиологик препаратларны саклау өчен стандарт режим булып тора", - дип билгеләде сәламәтлек саклау идарәсе җитәкчесе урынбасары Айгөл Борһанова.
Билгеләп үтик, 11 октябрьдән Татарстан Республикасында гражданнарның аерым категорияләре өчен яңа коронавирус инфекциясенә каршы мәҗбүри вакцинация игълан ителде. Татарстан Республикасы буенча баш дәүләт санитар табибы Марина Патяшина карары нигезендә, коллективларда вакциналаштыру 80%тан да ким булмаска тиеш.
Эш бирүчеләр 2021 елның 6 декабренә кадәр хезмәткәрләрне COVID-19дан икенче компонент белән вакцинацияләүне оештырырга тиеш.
Вакцинаның беренче компонентын алмаган хезмәткәрләр 9 ноябрьдән эштән туктатылырга тиеш, ә 7 декабрьдән яңа коронавирус инфекциясенә каршы вакцинация курсын төгәлләмәгән хезмәткәрләр.

http://nabchelny.ru/