Насвайга чират җитте

Депутатлар аны саткан өчен законнарны катгыйлатырга җыена. Чәйни һәм суыра торган тәмәке - насвай белән снюс -саткан өчен штрафлар берничә тапкыр артырга мөмкин. Дәүләт думасының Дәүләт корылышы һәм законнар чыгару комитеты җитәкчесе урынбасары Рафаэль Мәрданшин Административ хокук бозулар турында кодекска шундый төзәтмәләр эшләгән. Октябрь ахырында закон проекты Хөкүмәткә, аннары Дәүләт думасына карауга кертелгән. Экспертлар депутатның башлангычын хуплый. Русия Сәламәтлек саклау министрлыгының баш психиатр-наркологы Евгений Брюн мондый тәмәкене куллану җитди наркотик бәйлелеккә китерәчәк, дип исәпли.