Шәймиев Уграда кара-каршы тору тәмамлануны бәйрәм итү турында фикерен әйтте

Россия халкы тарихи көннәрне тикшерүгә түгел, ә агымдагы бурычларны хәл итү һәм илнең үсеше планнарны гамәлгә ашыру өчен берләшүгә мохтаҗ. Мондый фикерне Татарстан Республикасы Дәүләт киңәшчесе, ЮНЕСКОның мәдәниятара диалог буенча махсус илчесе Минтимер Шәймиев Угра елгасы янында кара-каршы тору тәмамлануны бәйрәм итү инициативасын шәрехләгәндә әйтте.

«Үсеш процессында, һичшиксез, сугышлар, җиңелүләр һәм җиңүләр булды. Үткән заманның тарихчыларына һәм хәзерге заман белгечләренә аерым чыганаклардан билгеле булганча, Уградагы кебек кара-каршы торулар да булган. Бу яхшы төшенчә, конфликтларны тыныч хәл итү омтылышын белдерү формасы», - диде Минтимер Шәймиев.

«Берләшү юлы һәрвакытта да катлаулы, ул бездән Россия Федерациясендә барлык халыклар өчен гармонияле үсеше шартларын булдыру өчен уйлап эшләүне таләп итә», - диде ул.

Минтимер Шәймиев Россиядә 2005 елдан бирле «Халыклар бердәмлеге көне» билгеләп үтелүен искәртте. Тарихи яктан бу бәйрәм Кузьма Минин һәм Дмитрий Пожарский җитәкчелегендәге халык ополчениесенең җиңүе нәтиҗәсендә XVII гасырда Россиядә фетнә чоры тәмамлануга бәйле рәвештә гамәлгә куелды.

«Шушы еллар эчендә бәйрәмнең әһәмияте арта бара. Киләсе 2020 ел - халкыбызның Бөек Ватан сугышында җиңүенең 75 еллыгын бәйрәм итү елы. Яңа Россиянең аякка басу тарихы бәхеткә, бай җир асты байлыклары булган төрле милләт һәм конфессия вәкилләренең язмышына кагыла», - дип фикерләре белән уртаклашты Шәймиев.

«Безнең изге бурычыбыз - киләсе елда Бөек Җиңүнең 75 еллыгын һәм Халыклар бердәмлеге көненең 15 еллыгын лаеклы һәм бердәм каршы алу. Безгә тарихны тикшерү белән шөгыльләнергә кирәкми. Агымдагы бурычларны хәл итү һәм безнең үсеш планнарын гамәлгә ашыру өчен берләшергә кирәк», - диде ул.

• Россия Президентының матбугат сәркатибе Дмитрий Песков хәбәр иткәнчә, Калуга өлкәсе губернаторы инициативасы Владимир Путин тарафыннан хупланмаган.

 https://tatar-inform.tatar/news/2019/11/13/196897/