Балаларны беренче сыйныфка кабул итүнең икенче этабы башланды

Бүген Татарстанның дәүләт хезмәтләре порталында балаларны беренче сыйныфка кабул итүнең икенче этабы башланды. Ул балалары мәктәпкә беркетелмәгән территориядә яшәүчеләргә исәпләнгән. Буш урыннар булган очракта, баланы мәктәпкә алачаклар.

Гаризаны булачак мәктәп укучысының ата-анасы яки законлы вәкилләре тапшыра ала. Хезмәт тулысынча цифрлаштырылган: электрон рәвештә тапшырылган гаризаны гомуми белем бирү оешмасына шәхсән китерелгәне белән бер үк тәртиптә караячаклар. Шул ук вакытта, гаризага барлык документларны да беркетергә кирәк.

Гаризалар 5 сентябрьгә кадәр кабул ителә, дип хәбәр итә ТР Дәүләт идарәсен цифрлы нигездә үстерү, мәгълүмат технологияләре һәм элемтә министрлыгының матбугат хезмәте.

Шунысын да искәртик: баланы беренче сыйныфка алу турындагы карар гариза һәм документлар тапшырганнан соң биш эш көне эчендә кабул ителә. Ата-аналарга кабул ителгән карар турында алар гаризада күрсәткән алым ярдәмендә хәбәр ителәчәк.