Мин бакчачы түгел, күңел өчен генә өйдә помидор үстерәм

– Өйдә помидор үстерүем күңел өчен генә. Моның бер сере дә юк. Гадәти җиргә кышкы каникулда, кояш карый башлагач орлыкларны туфракка утыртам. Бүгенге көндә кызарганнары озын үсми торган, «Москвич» сорты. Инде 4 помидор ашадык. Бик тәмле. 5-6 төп кенә утыртам. «Пиноккио» сортын да өйдә үстерәм. Анысының бер төбеннән бик күп помидор чыга.  Теплицага «Бабушкин секрет» сортын утыртабыз. Ул эре дә, тәмле дә.

Помидорларны ашламасыз үстерәм. Бераз торган, җылымса су гына сибәбез. Уңыш балаларга да, үзебезгә дә җитәрлек була, Аллаһка шөкер, – диде ул. Урамда кар булса да, Нуриевлар өйләрендә үстергән помидорларны ашый башлаганнар инде.