Ни өчен савыт-сабаны ашаганнан соң ук юарга кирәк?

Сорау:
Соңгы вакытта олы яшьтәге хатын-кызларның озын тырнаклар үстереп, аларны буяп, керфек ясатып йөрүенә хәйран калам. Күптән түгел мәчеттә дәресләр бирә башладым. Алтмышны узган бер ханым, инде ничә тапкыр аңлатсам да, ялганган керфекләре белән буялган тырнакларыннан арынырга теләми. Гәзит аша шул хакта аңлатсагыз, күпләр өчен файдалы дәрес булыр иде, дип уйлыйм. Чөнки мондый хатын-кызларның госел-тәһарәте дә дөрес түгел бит. 
Җавап:
Мөгаллимә ханым хаклы рәвештә борчыла. Буялган тырнаклар, ялганган керфекләр белән госел дә, тәһарәт тә дөрес булмый. Андыйлар намаз да, Коръән дә укый алмый. Чөнки хатын-кыз айлыгы беткәннән соң, яисә ире белән якынлык кылганнан соң госел коенырга тиеш. Госел алганда тәннең тары бөртеге хәтле дә урынына су тимичә калмый. Госелсез хатын-кызлар мәчеткә керә алмый. Шәригать кануны шундый. Шул хакта уйланып, гөнаһтан арынсак иде. Бу ханым гыйлем ала-ала үзенең гөнаһларын аңлар, камил тәһарәт алырга өйрәнер. Чөнки күп гөнаһлы гамәлләр гыйлем җитмәгәнлектән килә.

Сорау:
Төрле ташлардан, әйтик, гәрәбәдән (янтарь) ясалган муенсаны сәламәтлеккә файдасы бар дип тагу дөресме? Дингә каршы килмиме?
Җавап:
Традицион медицина аларның файдасын шаһитлык кыла икән, бу очракта кулланырга була. Әмма шунысын онытмыйк – шифа ул Аллаһы Тәгаләдән. Ниятегез дә дөрес булсын, таш булыша дип, Аллаһка ширек кылмагыз. Шул ук вакытта даруын да эчәргә, табиб кушкан башка дәвалану чараларын да кулланырга кирәк.

Сорау:
Савыт-сабаны ашаганнан соң ук юарга, чөнки аны шайтан ялый, диләр. Дөрес сүз микән бу?
Җавап: 
Савыт-сабаны шайтан ялавы дөрес. Пәйгамбәребез Мөхәммәд Мостафа салләллаһу галәйһи вә сәлләм идәнгә төшкән әйберне, өреп, кабарга куша, ягъни шайтанга ризык калдырмаска боера. Шуңа күрә тәлинкәдә, савыт-сабада да ризык калдырырга киңәш ителми. Шайтаннар калган ризыкны килеп ялыйлар, ашыйлар, һәм шуның белән бәрәкәтсезлек килә. Пәйгамбәребез хәтта ашаганнан соң бармакларны ялап куярга киңәш итә. Хәзерге заманда бармак ялап утыру әдәпсезлек дип санала, ләкин исламда – бу әдәп. Пәйгамбәребез Мөхәммәд Мостафа салләллаһу галәйһи вә сәлләм: «Ризыкның кайсы өлеше бәрәкәтле булуын сез белмисез», – ди. Шуңа күрә, кеше ашап китә, ә тамагы туймый, ә менә шул бармагын ялап кую аның тамагын туйдырырга мөмкин. Аннан соң, савыт-сабаны кичтән юмыйча калдыру фәкыйрьлеккә китерә, дигән сүз бар. Әгәрдә ризык ашалмаса, аның өстен каплап калдырырга кирәк. Су, ризык ачык торырга тиеш түгел, аның өсте һәрвакыт капланган булырга тиеш. Бу шулай ук шайтаннан саклый. Пәйгамбәребез: «Һич югында аркылыга бер таяк куеп калдырырга кирәк», – ди.
 
Сорау: 

Ни өчен Мөхәммәд пәйгамбәребез турында әйткәндә, «салләллаһу галәйһи вә сәлләм» дип тутырып әйтергә кирәк?
Җавап:
Бу сүзләр «Аллаһның аңа сәламе һәм рәхмәте булсын» дигәнне аңлата. Коръәндә Аллаһы Тәгалә: «Аллаһ Үзе һәм фәрештәләр Пәйгамбәргә салават әйтәләр, иман китергән кешеләр, сез дә аңа салаватлар әйтегез», – ди.
Пәйгамбәрнең исемен искә алганда, аңа хөрмәт йөзеннән, «салләллаһу галәйһи вә сәлләм» дип салават әйтәбез булып чыга. Аның бер хәдисендә дә «Пәйгамбәребез исемен ишетеп тә, аңа салават-сәлам әйтмәүче саранның сараны булыр» диелә.
Икенче хәдистә «Кем Пәйгамбәргә бер салават әйтсә, Аллаһы Тәгалә аңа 10 салават әйтә һәм аерым билгеләнгән фәрештә Пәйгамбәргә, фәлән кешенең улы яки кызы сиңа салават әйтте, дип җиткерәчәк» дип килә.

Сорау: 
Бүгенге көндә хатын-кызлар гына түгел, кайбер ир-атлар да парик кияргә тайчынмыйлар. Бу гамәл хатын-кыз өчен дә, ир-ат өчен дә тыелган, дип беләм, мин ялгышмыйммы? 
Җавап:
Динебездә кешенең гомерен яшь күрсәтү максатыннан чәчне кара төскә буяу рөхсәт ителми. Ә чал төшкән чәчләрне яшерер өчен башка төсләргә буярга мөмкин, мәсәлән, хна кулланырга була. Ә парик киюгә килгәндә, динебездә кешенең табигатен үзгәртү тыелган, димәк парик кию ир-атларга да һәм хатын-кызларга да рөхсәт ителмәгән гамәл.

Сорау: 
Балаларны зиратка алып керергә ярыймы?
Җавап: 
Бу гамәл тыелмаган. Ләкин монда берничә моментка игътибар итәргә кирәк: Баланы зиратка нинди максат белән алып керәсез? Кечкенә баланың психикасына зыян китерерлек гамәлләр кылынмасмы? Ә гомумән алганда, балаларга ахирәт турында, һәрбер гамәлебез өчен җавап бирәсе булу турында белү мәслихәт.

Сорау: 
Шампан шәрабын алып бирергә куштылар. Аны сатып алып, сораган кешегә тапшыру гөнаһ түгелме?
Җавап:
– Аның гөнаһы эчкән кебек үк булачак. Бу Пәйгамбәребез (с.г.с.) хәдисләрендә язылган.

Фото: дин битенә / фото https://ru.freepik.com сайтыннан