Әгәр продукция сатып алучыга зыян китерсә?

Бер хатын-кыз чәч буявы сатып алган, әмма аны кулланганнан соң баш тиресе бик нык пешкән, хәтта аңа хастаханәгә мөрәҗәгать итәргә туры килгән. Табиб аның тәненең химик пешүен раслый. Хатын-кыз чәчен җитештерүче күрсәткән инструкция буенча буяган. Хәзер ул сатучыга һәм җитештерүчегә карата нинди дәгъвалар белдерергә хокуклы икәнен белергә тели. 
ТР Дәүләт алкоголь инспекциясенең Чаллы территориаль органы белгече Рузилә Маненкова аңлата:
–    «Кулланучылар хокукларын яклау турындагы» закон нигезендә, гадәти шартларда файдаланган очракта, саклаганда, ташыганда һәм алга таба утильләштергәндә теләсә нинди эшләнмәнең сатып алучылар өчен куркынычсыз булуы шарт. Димәк, продукт сезнең сәламәтлеккә, әйләнә-тирәдәге кешеләргә һәм табигатькә, шулай ук сезнең милеккә зыян китерергә тиеш түгел. Бу кагыйдәләр дәүләт тарафыннан билгеләнгән һәм барлык җитештерүчеләр тарафыннан да үтәлә. 

Җитештерүче продуктны эксплуатацияләүнең бөтен чоры дәвамында аның иминлеген гарантияләргә бурычлы. Әгәр продукция сатып алучыга зыян китерсә, җитештерүче зыянны капларга тиеш.

Куркынычсызлыгын расламыйча продуктларны сату закон нигезендә тыелган. Әгәр товар сәламәтлеккә яки милеккә зыян китерсә, җитештерүче кичекмәстән продуктны сатуны туктатырга, төзексезлек сәбәпләрен бетерергә һәм продукцияне сатып алучылардан кире алырга тиеш. Уңайсызлыклар һәм тотылган чыгымнар өчен сатып алучы тулы компенсация алачак.