"Акыллы буын" ("Умное поколение") директорын лицензиясез эшләгәне өчен штрафка тарттылар

Учреждениедә хокук бозуларны прокуратура тапкан. Тикшерү күрсәткәнчә, 2020 елда үзәк өстәмә белем алуга гына лицензия алган. Шуңа да карамастан, «Акыллы буын»да башлангыч гомуми белем программасы буенча балалар белән дәресләр уздырылган. Моны мәктәп формасындагы укучылар һәм сыйныф укытучысы, уку әдәбияты, сыйныф тактасындагы язулар, дәресләр расписаниесе, шулай ук, өй эшләрен башкаруны да кертеп, дәфтәрләрдәге язмалар раслый.
Людмила Сидорова расписание буенча балалар белән дәресләр уздыру фактын кире какмады, әмма гаебен хокук бозуда танымады. Шәһәр суды матбугат хезмәте хәбәр иткәнчә, хатын-кыз үзәкнең өстәмә белем бирү буенча гына эшчәнлек алып барганлыгын әйткән. Балалар исә гаиләдә белем ала һәм өстәмә дәресләргә үзәккә йөри. Түләүле уку, ата-аналар белән иганә килешүләре төзелгән. Судья директорны лицензиясез эшләгән өчен гаепле дип таныды. Якын арада суд үзәкне ябу турындагы прокуратура дәгъвасын да караячак.

Фото:"Умное поколение"