Бүген Татарстанга Россия президенты килә

Россия Президенты Владимир Путин 17-18 июньдә Казанда узачак «Россия – Көньяк-Көнчыгыш Азия дәүләтләре ассоциациясе (АСЕАН)» саммитында катнашачак. Бу хакта журналистларга брифингта Президент ярдәмчесе Юрий Ушаков хәбәр итте.

Саммит Россия белән АСЕАН арасындагы мөнәсәбәтләрнең 35 еллыгына багышланган. 

Саммитның көн тәртибе

Форумның көн тәртибендә ике төп тема каралган: актуаль глобаль һәм региональ проблемалар буенча фикер алышулар; Россия – АСЕАН стратегик партнерлыгын үстерү буенча 35 ел эчендә башкарылган уртак эшкә күзәтү; шулай ук сәясәт, иминлек, сәүдә, инвестицияләр һәм гуманитар хезмәттәшлек өлкәләрендә яңа бурычлар билгеләү планлаштырыла.

Катнашучылар

Саммитта Россия Президентыннан тыш Бруней солтаны һәм Филипиннар Президенты, җиде хөкүмәт башлыгы – Вьетнам, Камбоджа, Лаос, Малайзия, Сингапур, Таиланд, Көнчыгыш Тимор премьер-министрлары катнашачак. Индонезиядән тышкы эшләр министры Сугиано, Мьянмадан Тышкы эшләр министрлыгының даими сәркатибе Хау Кхан Сум, шулай ук АСЕАНның генераль сәркатибе Као Кимхорн да булачак.

Программа

Саммит программасы 17 июньдә кичке сәгать 18:00 дә Россия Федерациясе Президенты исеменнән делегация башлыклары хөрмәтенә тантаналы кабул итү белән башлана. Ул Казан академия театрында узачак. Владимир Путин кунакларны театр фойесында каршылаячак, аннары кечкенә концерт программасы тәкъдим ителәчәк, ә аннан соң тантаналы кабул итү булачак.

Саммитның төп көне: мөһим очрашулар һәм килешүләр

Саммитның төп көне – 18 июнь. Иртән Владимир Путин делегация башлыкларын «Казан Экспо» халыкара күргәзмә үзәгендә каршы алачак. Фотога төшү церемониясеннән соң, сәгать 10:00 да саммитның беренче утырышы башлана. Владимир Путин һәм Филипиннар Президенты Фердинанд Маркос, саммит рәистәшләре буларак, массакүләм мәгълүмат чаралары вәкилләре катнашында утырышны ачачак. Башка катнашучыларның чыгышлары ябык форматта узачак.

Очрашу тәмамлангач, дүрт документ кабул ителәчәк:
• Казан декларациясе,
• 2026–2030 еллар өчен комплекслы эш планы,
• Энергетика буенча уртак белдерү,
• Мәдәният буенча уртак белдерү.

Юрий Ушаков сүзләренчә, Казан декларациясендә Россия һәм АСЕАНның халыкара проблематика һәм алдагы хезмәттәшлек юнәлешләре буенча уртак алымнары ныгытылачак. Аның әйтүенчә, документта барлык илләрнең халыкара хокукның гомум танылган принципларына һәм БМО Уставына нигезләнгән гадел, демократик, күп полярлы дөнья тәртибе формалаштыруга тугрылыгы аерым ассызыкланган. Комплекслы эш планында төрле тармакларда – сәясәт, иминлекне тәэмин итү, сәүдә, инвестицияләр, энергетика, авыл хуҗалыгы, фән, технологияләр һ.б. өлкәләрдә кооперацияне киңәйтү буенча адымнар булачак.

Аннары  иртәнге аш форматындагы икенче утырышы узачак. Ул Евразия киңлегендә интеграция процесслары темасына багышланачак. Шуны исәпкә алып, иртәнге ашта ШОС Генераль сәркатибе Нурлан Ермекбаев һәм Евразия икътисадый комиссиясе коллегиясе рәисе Бакытжан Сагинтаев катнашачак. Россия Сәүдә-сәнәгать палатасы башлыгы Сергей Катырин тәкъдим итәчәк «Россия – АСЕАН» эшлекле форумы нәтиҗәләре турында доклад тыңланачак. Бу утырыш ММЧ өчен ябык булачак. Ул тәмамлангач, Владимир Путин һәм Фердинанд Маркос матбугат өчен белдерү белән чыгыш ясаячаклар. Шул рәвешле, саммит программасы тәмамланачак.