Чаллы мэры бәхетсезлек очракларыннан сабак алырга чакырды

Шәһәрдә кар чыгару һәм йортлардагы авыш түбәләрне, подъезд козырекларын кардан, боздан  чистрату эше дәвам итә. «Барлыгы 77 меңнән артык рейс, 1 млн. 400 мең  куб  метр кар чыгарылган. Бу узган ел белән чагыштырганда 2,5 тапкыр артыграк», – диде башкарма комитет җитәкчесенең беренче урынбасары Илья Зуев.

Шәһәр мэры Наил Мәһдиев  район һәм идарә башлыкларын учреждениеләрнең, торак йортларның түбәләрен кардан чистартуны контрольдә тотарга кушты. «Төрле муниципалитетларда булган күңелсез хәлләрдән сабак алып, бу эшне тиешле дәрәҗәдә башкарыгыз. – дип кисәтте ул. – Бу атна уртасында көннәр җылыта. Түбәләрдән кар төшә башлый.  Күңелсез хәлләр килеп чыкмасын өчен эшне җиренә җиткереп башкарыгыз, муниципалитет карамагындагы 400 объектның һәм шәхси предприятеләр карамагындагы объектларның түбәләрен кардан һәм боздан чистартырга кирәк», – дип кисәтте ул.