Чаллыда 400нче сабый туды

Чаллыда юбилей елында 400нче бала дөньяга аваз салды. Ул –Алмазия һәм Ришат Бәдриевларның дүртенче баласы.
Бүген Кама балалар медицина үзәгендә сабый белән аның әнисен тантаналы төстә өйләрнә озаттылар. Бәдриевларның шатлыгын уртаклашырга әти-әниләре, туганнары, дуслары гына түгел, шәһәр мэры Наил Мәһдиев тә килде. 
Мэр гаиләне шатлыклы вакыйга белән котлап, изге теләкләрен җиткерде. Бүләкләр тапшырды. Сабыйга һәм әнисенә ныклы сәламәтлек теләде. «Сәламәт һәм көчле булып үсегез», – диде ул.  Шулай ук «вакыт капсула»сын калдырды. Илфат аны 18 яше тулгач ачып укыячак. 
Бәхетле әти Ришат Бәдриев үзенең һәм хатынының күпбалалы гаиләдән булуын әйтте. Алар күпбалалы гаилә булырга теләгәннәр. Хәзер бу гаиләдә ике кыз һәм ике малай үсә. 
Фотолар мэрның телеграмм каналыннан алынды.