Чаллыда эшкә урнашырга килгән хатын-кызны сак эте тешли

Вакыйга «Ремдизель» заводы мәйданында була. Ханым бәйдәге этне ашатырга дип иелгәндә, алабай тешләре белән аның аягына ябыша.  Шәһәрдәшебез куллары белән селтәнеп хайваннан ычкыну җаен таба. Аңа пропусклар пунктында утыручы ярдәмгә килә. Ул зыян күрүчегә жгут бирә һәм ашыгыч ярдәм хезмәтен чакырта. Яраланган хатын табиблар килгәнче аягын кысып бәйләп, канын туктата. Медицина белгечләре исә хатын-кызны хастаханәгә алып китәләр һәм операция ясыйлар. 

Шушы көннәрдә прокуратура хезмәткәрләре әлеге очрак буенча тикшерү эшен тәмамлады. Аларның сүзләренә караганда, урында тиешле куркынычсызлык чаралары күрелмәгән. «Охрана» ФГУП җитәкчесе адресына әлеге җитешсезлекләрне бетерергә кушылды.