Чаллыда автобуста йөрүчеләр арткан

Чаллыда пассажирлар агымы арткан. Бу шәһәр маршрутларына зур автобуслар җибәрү нәтиҗәсе. 

Чаллы мэры Наил Мәһдиев әйтүенчә, автобусларда 2025 елның 8 аенда 28,7 млн, узган елда 24, 4 млн пассажир йөргән. 

"Зур автобуслар халыкны үзенә тарта. Алар уңайлы, куркынычсыз. Без үзебезнең алга бу ел ахырына автобус паркын тулысынча формалаштыру бурычын куябыз. Моның белән бергу ремонт базасы үсеше белән дә шөгыльләнәбез. Бүгенге көндә шәһәр бюджетының өстәмә кеременнән 400 млн сумнан артык акча ремонт базасы өчен бүлеп бирелде. 

 Транспорт белән тәэмин итү мәсьәләрен хәл итәбез. Безнең карамакта 100 трамвай бар. Аларны да яңартырга кирәк. Әмма башта автобуслар мәсьәләсен хәл итү зарур" , - диде ул шәһәр советы сессиясендә. 

Мэр җәмәгать  транспортын өзлексез эшләтү өчен автопаркта кимендә 215 автобус кирәк булуын искәртте. Тагын 30 автобус алынса Чаллы бу күрсәткечкә ирешәчәк.