Чаллы мэры: Татар театры ел ахырына күчә, урыс театры уңайлы җиргә урнашырга тиеш

Чаллы мэры Наил Мәһдиев шәһәрнең татар театры ел ахырында яңа бинага күчәчәк дип белдерде, ә урыс театры өчен зуррак бина һәм транспорт ягыннан уңайлырак урын эзләнә диде. Наил Мәһдиев "Бизнес Онлайн" газетасына белдерүенчә, шәһәрнең татар театры "Колизей" бинасына ел ахырына кадәр күченеп бетәргә тиеш. Анда 300 урынлы зал әзерләнә. Ә инде "Мастеровые" театрына килгәндә, мэр бу проблемны үзенчәрәк күрә. "Бу 400 урынлы зал булырга тиеш. Машиналар кую урыны яхшы кирәк. Урыс драма театры шулай да зуррак булырга тиеш, ихтыяҗга карап. Урыны әле билгеле түгел. Бәлки, ул Чулман урамында булыр, ЗАГС белән бер юл өстендә. Урыс театры өчен иң мөһиме - транспорт ягыннан җайлы булу. Чулман урамы бу яктан уңайлы. Ләкин, бу - вариантларның берсе генә", ди Мәһдиев. Урыс театры проектына татар театры яңа бинага урнашып беткәч тотыначаклар. https://www.azatliq.org/a/29064888.html