Электр өчен ташлама кайтарам дип, 280 мең сум түләгән

53 яшьлек Түбән Кама кешесенә ир-ат шалтыратып, үзен “Энергосбыт” хезмәткәре итеп таныштырган. Ул электр энергиясе өчен ташлама буларак акчаны кайтарырга кирәк ди, акчаны алыр өчен смс-хәбәр белән килгән кодны атарга кирәк була. Ир-ат аферистка ышанып, бөтен шартны үти. Берникадәр вакыттан соң икенче кеше шалтыратып үзен хокук саклау органнарыннан дип атый. Ир-атка моңа кадәр мошенник белән сөйләшкәнен, хәзер аның исеменә кредит алалар дип аңлата. Зыян күрүчегә тиз арада үзенә кредит алып, акчаны “куркынычсыз счет”ка күчерергә кушалар. Ир-ат шулай эшли дә, билгесез затларның счетына 280 мең сум акча күчерә.

Әлеге факт буенча җинаять эше кузгатылган.