«Ядәч» фильмында яшь герой Илһам нигә татарча сөйләшми?

Чара "Мадагаскар" кинотеатрында узды. 280 урынлык зал шыгрым тулы иде. Кинотеатр җитәкчелеге әйтүенчә, нибары 3 көн эчендә тулы зал җыю - картина өчен яхшы күрсәткеч. Моңарчы очрашулар Мәскәүдә, Самара, Менделеевск, Түбән Кама, Алабугада да уңышлы үткән. 

Картинаның татар телендәге вариантын караганнан соң тамашачылар сәгать ярым сорау арты сорау яудырды. “Алсу Хәйруллина ни өчен татарча сөйләшергә яратмый?”, “Ни өчен фильмдагы геройлар аракы эчә?” “Ядәч” фильмын ничә ел төшергәннәр?”, “Картинаның дәвамы булачакмы?” һ.б. һ.б. Шул ук вакытта кешеләрнең авторны яратып килүе сизелә – сорау бирер алдыннан рәхмәтләрен җиткерәләр, горурланабыз, диләр. 

Яшь кинорежиссер 6 яшьлек Илһамны уйнаучы Юныс Таировны ничек табулары, аның оста итеп уйнавына ничек ирешүләрен дә сөйләде. Оештыручылар кастинг игълан итә. Анда килгән балалар арасыннан Юныска тукталалар, тик Байбулатка аның татарча сөйләшмәве ошап бетми. Картинаны төшерүче төркем татар авылларына бара. Тик, ни кызганыч, алар фильмда төшәргә теләге, артистлык сәләте  булган балалар арасында туган телендә чиста сөйләшкәннәре табылмый. Аннары Юнысның таэквондодан тыш конферансьелыкка да өйрәнүен дә искә алып (анда чиста, матур итеп сөйләргә өйрәтәләр), аны рольгә билгелиләр. Режиссер фикеренчә, аның татарчаны белмәве хәтта чынбарлыкка ныграк та туры килә.  

Картинаны бер айда диярлек, ә төгәлрәге 20 көн эчендә төшерәләр. Әлбәттә, балага тыгыз эш режимы җиңел бирелми: “Кайвакыт аны үгетләргә, кайвакыт, әйтик сүзсез кадрлар вакытында хәтта мультфильм да куярга туры килде – ул экранга, тамашачыга игътибар белән карый кебек тоела, ә чынлыкта ул әкият карый”. 
Әлеге очрашу турындагы тулы язманы якын арада “Шәһри Чаллы” битләрендә укый аласыз.