Җиңүчеләр һәм призерлар артты

Тугызынчы һәм унберенче сыйныф укучылары 22 фән буенча үзләренең белемнәрен сынады. Башкарма комитетның мәгариф идарәсе башлыгы Рөстәм Хуҗин әйтүенчә, олимпиаданың төбәк этабында 49 укучы – җиңүче,158е – призер дип танылды. «Җиңүчеләр һәм призерларның күбесен алты белем бирү учреждениесе әзерләгән, болар – 26нчы гимназия (59 кеше), А.С. Пушкин исемендәге 78нче лицей (32 кеше), 77, 76, 57нче гимназияләр, 32нче мәктәп», – диде ул. 

Чаллы укучылары немец телен, физкультураны, тарих фәннәрен аеруча яхшы белә икән. 

«Шәһәр командалары узган ел белән чагыштырганда нәтиҗәләрен яхшырттылар. Җиңүчеләр һәм призерлар саны 10 кешегә, катнашу нәтиҗәлелеге 3%ка артты», – дип билгеләде Рөстәм Ниязович. 

4 – 11 сыйныф укучылары арасында үткәрелгән республика олимпиадасында да Чаллы укучылары югары күрсәткечләргә ирештеләр. Олимпиадалар 30 фәннән узды, аларда 267 укучы катнашты, нәтиҗәдә 14 җиңүче һәм 127 призер булды.

«Бездә – химия, физика буенча гадәттәгечә югары күрсәткечләр. Быел 13 фән буенча нәтиҗәләр яхшырды. Укучыларыбызны әзерләгән педагогларга, укытучыларга, лаеклы нәтиҗәләр күрсәткән укучыларга рәхмәт. Бөтенроссия олимпиадасы финалына узган барлык җиңүчеләргә һәм призерларга уңышлар телибез», –  диде Рөстәм Хуҗин.