Илһам Шакиров премиясенә ия булучыларны 15 февральдә Габдулла Тукай исемендәге татар дәүләт филармониясендә бүләкләячәкләр

«Катнашучылар саны әз булмады, бәйгенең биографиясе дә киң. Мәсәлән, Кыргызстаннан, Финляндиядән, Үзбәкстаннан катнашучылар булды. Җиңүчеләргә 15 февральдә Татар дәүләт филармониясендә премияләр тапшырылачак», — дип сөйләде мәдәният министры урынбасары Дамир Натфуллин Илһам Шакиров исемендәге Республика премиясенә багышланган матбугат конференциясендә.

Министр урынбасары сүзләренчә, бәйгедә ике этап булган. «Мәдәният министры каршында экспертлар төркеме булдырылган иде. Алар арасында Татарстан белгечләре булды. Бу беренче баскыч иде. Иң соңгы этапта жюри әгъзалары декабрь аенда өч премияне игълан итте», — дип сөйләде ул.

Моңа кадәр «Татар-информ» мәгълүмат агентлыгы Илһам Шакиров исемендәге Республика премиясенә кемнәр ия булганын язган иде. Илһам Шакиров премиясе ике елга бер мәртәбә тапшырылачак. 

Чыганак: Татар-информ