Машина тәрәзәсен ватып акчасын урлаган

37 яшьлек ир-ат иномаркасын җир асты парковкасында калдыра. Ике сәгать тә үтми, машинасыннан 50 мең сум акчасы югала. Карак машинага арткы тәрәзәне ватып үтеп керә. Хокук сакчылары җинаять кылуда гаепләнүче эзенә тиз чыгалар. Ул - беркайда да эшләмәүче 36 яшьлек ир-ат. Моңарчы да шундый төр җинаять кылып, хөкем ителгән булган. Хәзер аңа 5 елга кадәр ирегеннән мәхрүм ителү яный. Шәһәрдән читкә чыкмаска дигән чик чарасы билгеләнде.