Мисырда һәлак булган Татарстан табибының гаиләсе кайткан

Хургада янындагы диңгездә батискаф батуы нәтиҗәсендә зыян күргән Татарстан педиатры Кристина Вәлиуллина һәм аның ике кызы Россиягә кайттылар.

Мәгълүм булганча, 27 мартта Вәлиуллиннар гаиләсе 10 һәм 15 яшьлек кызларын алып диңгез астына экскурсиягә барырга җыенганнар. Ләкин сәяхәт фаҗига белән тәмамланган.

50 кеше утырган батискаф баткан. Нәтиҗәдә алты кеше һәлак булган. Аларның 4се Россия гражданины.  Һәлак булучылар арасында Ютазы районы үзәк хастаханәсе табибы Равил Вәлиуллин да булган. 

«Ирем эшендә кешеләрнең гомерен саклап калды. Ял иткәндә дә ул батискафтагы кешеләрне коткаруга үз өлешен кертте. Кызганыч, үзе һәлак булды», – диде аның турында хатыны. 

Аның хатыны һәм кызлары берничә көн хастаханәдә ятып чыкканнар.

Якын арада Равил Вәлиуллинның мәетен кайтарырга тиешләр. Чыгымнарны иминият компаниясе каплый.