Игътибар: Чаллы паркларында сары, зәңгәр киемнән кешеләр йөри

Алар - территорияне талпаннардан агулаучы белгечләр. Хәзер бөҗәкләрнең активлашкан чагы. Тиздән шәһәр парклары ачылачак. Шуңа күрә иң беренче кеше күп йөри торган урыннарны - парк, скверларны - эшкәртәләр. Агуны үлән, агач төпләренә, куакларга, асфальт тирәләренә һәм кәҗә сукмакларына сиптерәләр. 

"Без паркларга 3 көн йөрмәгез, дип белдерүләр элеп чыктык. Агулагач, 3 көн үтәргә тиеш бит. Дезинфекцияне шәһәр үткәрә. Без кисәтү ясыйбыз", - дип сөйләде "Кулҗтура һәм ял паркы" директоры урынбасары Ришат Сәлимгәрәев.