Сәрия Нәбиуллина: «Аннары белмәдек дип утырырлык булмасын!»

Зәй районы Кәрәкәс авылында «Авыл көне» үтәчәк. Аны быел 3 августта оештырырга исәп тоталар. 

– Аның датасы очраклы түгел: авыл халкы белән сөйләшенгән – һәр елны августның беренче шимбәсе. Әлеге күркәм чараны әнием Сәрия Нәбиуллина белән бергә инде бишенче ел рәттән оештырабыз. Әти-әниемнең туган авылында уза торган бу бәйрәм миңа бик якын һәм кадерле. Артистлар кайта, халык рәхәтләнеп уеннарда катнаша, җыр-бию тынып тормый. Коллегам Виктор Агапов бик зур ярдәм күрсәтә, Ренат Әгълетдинов исемле дустым сәхнә куюда булыша, ут, музыкаль бизәлеш өчен җавап бирә. Кирәк-яраклар ташу өчен «Газель» машиналарын да биреп торучы дусларым да бар, – дип сөйләде безгә музыка остасы, популяр тавыш операторы Илсур Нәбиуллин.  

– Бөтен кешене дә чакырып калам. Елдагыча шәп булачак. Килегез, күрегез, соңыннан: «Шундый искитикеч бәйрәм булды» - дип, үз күзләрегез белән күргәнне мактап сөйләрсез, – дип бәйрәмгә чакырып кала җырчы Сәрия Нәбиуллина. 

Кәрәкәс авылы бәйрәмендә танылган артистлар Рөстәм Әсәдуллин, Нәркис Зиннәтуллин, Инзилә Сәлимова, Артур Салихов, Гөлдания Хәйруллина, Римма Никитина да чыгыш ясаячак. Башлана 17 сәгатьтә.