Татарстан юлларында ел башыннан 40 кеше һәлак булды

8 февральгә Татарстан Республикасы территориясендә 228 юл-транспорт һәлакәте теркәлгән, аларда 40 кеше һәлак булган һәм 300 кеше яраланган. Январь енда гына да 29 кеше һәлак булган. Узган елның шул ук чоры белән чагыштырганда аварияләр саны кимегән, ә һәлак булучылар саны арткан. Бу хакта ТР Министрлар Кабинетында узган брифингта Эчке эшләр министрлыгының ГАИ идарәсе башлыгы Рөстәм Гарипов хәбәр итте.

Юл һәлакәтләренең төп сәбәпләре - бер полосадан икенчесен күчү кагыйдәләрен бозу, юл чатларын узу чиратларын үтәмәү һәм машина йөртүчеләрнең игътибарын читкә юнәлтү кала. Еш кына, ДАИда билгеләп үткәнчә, кешеләр автомобильгә идарә итә һәм шул ук вакытта телефон карый.

Рөстәм Гарипов каршы як хәрәкәт полосасына чыгуга бәйле автоһәлакәтләргә аерым тукталды. Бу маневр юл хәрәкәтендә катнашучыларның гомерләренә куркыныч тудыра, бигрәк тә каршы як полосага чыгу кагыйдәләр белән тыелган урыннарда.

"Бер кешенең үлеме – ул инде дәүләт һәм гаилә өчен фаҗига. Каршы як полосага чыгуга бәйле бер юл-транспорт һәлакәтендә генә дә өчкә кадәр кеше һәлак булырга мөмкин", - дип аңлатты ТР Баш дәүләт автоинспекторы.

Елның бер ае эчендә республикада исерек машина йөртүчеләр катнашында сигез юл-транспорт һәлакәте теркәлгән, аларда дүрт кеше һәлак булган һәм ун кеше төрле дәрәҗәдәге тән җәрәхәтләре алган. ТР Дәүләт автоинспекциясе искәртә: исерек килеш руль артына утыру – юл хәрәкәте кагыйдәләрен тупас бозу.

"Алкоголь реакцияне киметә, контрольне киметә һәм ераклыкны кабул итүне боза. Иң мөһим нәтиҗә – штраф яки бәяләмә түгел. Бер-ике стакан аркасында кемдер өенә кайтмаска мөмкин. Без мондый фаҗигале хәлләрне күп беләбез. Аларның берсе Казанда була: гаиләдә бала туа, яшь әти моны билгеләп үтә һәм шул ук көнне һәлакәттә һәлак була. Күз алдына китерегез: бала үсәчәк һәм әтисенең туган көнендә үлгәнен беләчәк», – дип сөйләде Рөстәм Гарипов.

Ел башланганнан бирле Татарстан юлларында 26 бала имгәнгән. 2 февральдә ТР Мамадыш районында Renault Logan автомобилен йөртүче идарә итүне башкара алмаган һәм йөк машинасына бәрелгән - һәлакәттә ике айлык бала һәлак булган.

Бала белән машинада бару - бик зур җаваплылык, дип искәртәләр ГАИда. Моннан тыш, кар яуган вакытта автомобиль белән идарә иткәндә аеруча игътибарлы булырга кирәк. Мондый һава торышы булганда кечкенә генә хата да кеше үлеменә китерергә мөмкин.

Җәяүлеләр катнашындагы юл-транспорт һәлакәтләре аеруча борчу тудыра. Һәр бишенче үлем очрагы диярлек - җәяүлене бәрдерү. "Мондый һәлакәтләрнең күбесе юлны аркылы чыгу урыннанрыннан читтә, тәүлекнең караңгы вакытында яктылык җитәрлек булмаган участокларда була", – дип билгеләп үтте Татарстан Республикасы транспорт һәм юл хуҗалыгы министры Фәрит Хәнифов.

Юл төзүчеләр җәяүлеләрнең иминлеген тәэмин итү өчен аерым эш алып баралар. Быел тротуарлар төзелешенә 200 млн сум акча бүлеп бирелгән. Ясалма яктыртуга рекордлы сумма – 801 млн сум тотылачак. Шәһәрләрдә мәктәпләр һәм балалар бакчалары урнашкан урыннарга аерым игътибар бирү планлаштырыла.

"Һәр җәяүленең, олыларның һәм балаларның киемнәрендә яктылыкны кире кайтара торган элемент булуы мөһим. Онытмагыз, безнең гомер безнең кулларда. Ата-аналар балаларының иминлеге турында кайгыртырга тиеш. Алар балалары өчен яктылык кайтаручы элементлар белән кием сатып алырга тиеш", - дип аңлатты Татарстанның Баш дәүләт автоинспекторы.

Бүген юл хәрәкәтендә велосипед, самокат, мопедлардагы курьерлар бик күп йөри. Кызганычка каршы, аларның күбесе, заказны тизрәк илтеп җиткерергә һәм күбрәк акча эшләргә омтылып, юл хәрәкәте кагыйдәләрен боза. Мондый "узыш" фаҗигагә китерергә мөмкин. Гыйнвар ахырында Казанның Побежимов һәм Копылов урамнары чатында курьер светофорның кызыл утына узган һәм машина юлында машиналар булуга игътибар итмәгән. Ул машина юлына якынлашып килүче автомобильне туктатырга мөмкин булмаган иң соңгы моментта чыккан. Бәрелеш килеп чыга, 18 яшьлек егет алган җәрәхәтләрдән ашыгыч ярдәм машинасында вафат була.

"Без курьерларга юлга чыгуны тыя алмыйбыз, әмма без алардан юл хәрәкәте кагыйдәләрен үтәүне таләп итәбез, бөтен көчебезне куябыз, аларның җитәкчелеге белән очрашулар үткәрәбез. Әйе, без барыбыз да комфорт телибез. Әмма уңайлылык өчен иминлек һәм үзара хөрмәт кирәк. Бу юнәлештә эш көчәйтеләчәк", - диде Рөстәм Гарипов.

Татарстанда автомобиль юлларын норматив хәлгә китерү буенча актив эш алып барыла. Бу - юлларда авария хәлләре куркынычын киметергә тиешле чараларның берсе. Кайбер участокларда колеяны бетерү, ясалма тигезсезлекләр һәм ясалма яктырту урнаштыру планлаштырыла. Шәледән Казанга кадәр юлны тоташ яктырту, шулай ук Ижау ягыннан М-7 трассасына якынлашу планлаштырылган.

"Безнең өчен төп программа - "Яшәү өчен Иинфраструктура" илкүләм проекты. 2030 елга республикадагы юлларның 85%ы норматив хәлгә җиткерелергә тиеш. Без моңа ирештек инде, ирешкәннәрне саклап каласы гына калды», – дип ассызыклады Фәрит Хәнифов.

Шул ук вакытта, транспорт һәм юл хуҗалыгы министры сүзләренә караганда, төбәк юлларының сыйфатын яхшырту таләп ителә. Нормативларга җавап бирә торган төбәк трассалары өлеше кимендә 60% тәшкил итәргә тиеш. Татарстанда бу күрсәткеч бүген 52% тәшкил итә.

"Без юлларның сыйфатын тәэмин итү, шулай ук хокук бозуларны теркәү буенча актив эшлибез. Без юл-транспорт һәлакәтләренең гомуми саны кимүен күрәбез, әмма үлем-китем белән тәмамланган аварияләр саны арта. Безгә ваемсыз машина йөртүчеләрнең психологиясе аңлашылмый, алар аркасында бер гаебе булмаганнар газап чигә. Аларга коточкыч видеолар, фотографияләр һәм авария статистикасы җитмимени? Безгә уянырга һәм юлларда үзебезне дөрес тота башларга кирәк, ә иң мөһиме – тәвәккәллектән тыелырга кирәк", - диде Фәрит Хәнифов.

"Татар-Информ" МА.