Театрыбыз, ниһаять, яңа биналы булачак

Чаллы дәүләт татар драма театрының яңа бинасы шәһәр хакимияте белән "Палитра" сәүдә үзәге арасында төзеләчәк. Аның проекты инде әзерләнеп беткән. Мәдәният министрлыгында аны Президентыбыз Рөстәм Миңнехановның раславын гына көтәләр. Проектта күренгәнчә, театрның өч залы булачак: зур залда - 300, кечесендә - 160 урын. Тагы репетицияләр өчен 60 урынлы зал каралган. Театр урнашкан "Азатлык" мәйданының бу өлеше дә үзгәртүләр кичерәчәк. Анда бинаның архитектурасына килешле итеп агачлар утыртылачак, чәчәк түтәлләре ясаячаклар.