100 меңгә кәстрүл алганнар
Интернет челтәрендә шәһәрдәшләребез яңа төр мошенниклык гамәле турында чаң кага. Өлкән яшьтәге ханымнарны кулинар тапшыруга дип чакыралар да, 100 мең сумга кәстрюль-табак сатып алу өчен кредит төзиләр. Зыян күрүчеләр, гадәттә, 40-65 яшь аралыгындагы ханымнар.
Аларны телефон аша дөрес туклану һәм файдалы ризык пешерерү серләренә өйрәтәбез диеп, алдалап чакырып китерәләр. Үзләре белән паспортларын да алырга кушалар. Һәрбер килүчүгә кыйммәтле бүләк - соксыккыч вәгъдә итәләр. Билгеләнгән урынга килгәч, ханымнарга янәсе танылган артист һәм "Смак" тапшыруының элекеге алып баручысы Андрей Макаревич куллана торган савыт-сабаларны да күрсәтәләр. Анда пешерелгән ризык барлык витаминнарын саклап, бөтен гаиләне сөендерәчәк, дип ышандыралар. Аларны алырга акчасы җитмәгән ханымнарга шунда ук кредит рәсмиләштерү мөмкинлеге дә булдырылган. Матур сүзләргә һәм танылган артист авторитетына ышанып, шәһәрдәшләребез капканга эләккәнен сизми дә кала. Өйләренә кайтып, гаилә әгъзалары белән сөйләшкәннән соң гына, алар мошенниклар тозагына эләгүен аңлый.
Артист Андрей Макаревичның рәсми вәкилләре исә җырчының әлеге савыт-сабага бернинди катнашы булмавын хәбәр итте. Мондый очраклар исә илебезнең башка шәһәрләрендә дә теркәлгән булган.
Яр Чаллы шәһәре Эчке эшләр идарәсе матбугат үзәге җитәкчесе Артур Муллин шәһәрдәшләребезне уяу булырга чакыра:
- Шикле презентацияләр, тапшыруларга үзегез генә йөрергә тырышмагыз. Әгәр сезгә берәр нәрсә тәкъдим итсәләр, киңәшләшмичә бернәрсә дә алмагыз, документларга кул куймагыз. Мошенниклар көн дә яңа төр алдау ысулларын уйлап чыгара. Шуңа да уйлап, мөмкинлек булса юристлар, адвокатлар белән киңәшләшеп кенә эш итегез. Алданган очракта инде, Кулланучыларның хокукларын яклау комитетына мөрәҗәгать итергә кирәк.
Әйтергә кирәк, шәһәребездә моңа охшаш алдау очраклары моңа кадәр дә күзәтелгән иде. Кыйммәтле бизәнү косметикасы һәм кремнарына кредитлар рәсмиләштерүләрне хәтерлисездер. Ул вакытта да күпчелеге өлкән яшьтәге ханымнар күңелсез очракларга юлыкты. Шуңа да барлык шәһәрдәшләребезгә, ә аеруча ханымнарга, үтә дә уяу булулары сорала. Бушлай сыр капканда гына була - шуны онытмагыз.
Следите за самым важным и интересным в Telegram-каналеТатмедиа
Нет комментариев