Чаллы театры яңа сезонны премьера белән ача

Аяз Гыйләҗев исемендәге Чаллы татар дәүләт драма театры яңа сезонны ачарга әзерләнә.

Коллектив быел иҗади сезонны 8 сентябрьдә драматург Туфан Миңнуллин әсәре буенча куелган «Диләфрүзгә дүрт кияү» спектакленең премьерасы белән башлап җибәрә. «Быел премьералар күп булачак», - диде театрның сәнгать җитәкчесе Олег Кинҗәгулов. 

Яңа спектакльне Олег Кинҗәгулов сәхнәгә куйды.  «Мәйдан» журналы редакторы Лилия Гыйбадуллина спектакльне : «Рәхәтләнеп ял итә торган, күңелле спектакль», – дип бәяләде. 

Яңа спектакльне караган  тамашачылар да аны яратты. «Көлдерә торган, җырлы-биюле җиңел рәхәт спектакль. Артистлар оста уйный», – диде Гөлинә Гусамова.

Фотолар Айгөл Әхмәтгалиевадан алынды.