Чаллыда 59 балалар бакчасы капиталь төзекләндереләчәк

Шәһәрнең 59 балалар бакчасы һәм 16 мәктәбе төзекләндереләчәк. Бу хакта эшлекле дүшәмбе киңәшмәсендә мэр Наил Мәһдиев хәбәр итте. 

“Аларның бөтенесе дә 1980нче елларда төзелгән. Дөрес, бөтенесен дә бер ел эчендә капиталь ремонтлау  мөмкин түгел. Максатыбызга әкренләп ирешәчәкбез”, - диде мэр. 

Исегезгә төшерәбез, быел Чаллыда 7 мәктәп капиталь төзекләндерелде. Бу максатка Татарстан бюджетыннан 135 млн сум акча бүленеп бирелде. 

1 сентябрьда ишекләрен 2 яңа мәктәп ачачак. Аның берсе “Притяжение” микрорайоны, икенчесе 34нче комплекста урнашкан. Мәктәпләрнең һәркайсы 1501 балага исәпләнгән.