Чаллыда ата-аналар тарихны яхшы беләме?

Бүген 14 мәктәптә ата-аналар тарих фәненнән бердәм дәүләт имтиханын (ЕГЭ) тапшырды. Башкарма комитет җитәкчесе урынбасары Рамил Хәлимов, мәгариф идарәсе башлыгы Рөстәм Хуҗин, Чаллы дәүләт педагогика университеты директоры Әлфинур Галиәкбәрова да белемнәрен тикшерде. 

"Ата-аналарның ЕГЭ тапшыру" россиякүләм акциясендә барлыгы 55 кеше катнашты. Әлеге чараның максаты - бердәм дәүләт имтиханының куркыныч булмавын күрсәтү. Имтихан тапшыру үзенчәлекләренә - теркәлү, балаларның утыру рәвеше, тестларны тарату, күзәтчелек һ.б. - төшендерү.

Ата-аналарга биремнәрне урында ук принтердан чыгарып тапшырдылар. Алар имтиханның беренче өлешен генә (тест) ясады. Барлыгы 15 сорау. 1 сәгать вакыт бирелде. БДИ эшләрен шул ук көнне тикшерделәр. 

Искәртергә кирәк, тарих авыр фәннәрдән санала. Аның буенча быел 198 Чаллы укучысы имтихан тапшырырга планлаштыра.