Чаллыда эчәк инфекцияләре авырулары һәм инфарктлар арткан
Быелгы җәй эссе көннәргә бай булды. Берәүләр кояшка сөенеп йөрсәләр, икенчеләре авырулардан җәфа чикте. Җәйге челләдә аеруча йөрәк-кан тамырлары һәм эчәк инфекцияләре авыруларыннан зыян күрүчеләр шактый арткан.
Бу хакта хакимияттә узган конференциядә шәһәребезнең сәламәтлек саклау идарәсе җитәкчесе урынбасары Альбина Шәйхетдинова, "5 нче шәһәр хастаханәсе" стационарының кардиология бүлеге мөдире Венера Гыйльфанова һәм "Яр Чаллы шәһәренең йогышлы авырулар хастаханәсе"нең баш табибы урынбасары Татьяна Әгъләмова сөйләделәр.
Узган елны 1270 инфаркт очрагы теркәлгән булган. 2016 елның август аена алар саны 800 дән артып киткән. Медицина белгечләре фаразлавынча, ел ахырына инфаркт очраклары, узган елгы күрсәткечләр белән чагыштырганда, 1,5 тапкыр артырга мөмкин. Шунысы куанычлы әлеге диагноздан үлүчеләр саны азайган. Гомумән, соңгы җиде ел эчендә алар 2,5 тапкыр кимегән.
Венера Гыйльфанова әйтүенчә, инфарктлар саны артуына дәвамлы эссе көннәр нык тәэсир итте. Моннан тыш Чаллыда өлкән яшьтәге кешеләр саны да арткан. Бу исә йөрәк-кан тамырлары авырулары да күбәя дигән сүз. Табиблар андый авыруларга даруларны һәрчак үзләре белән йөртергә киңәш итәләр. "Йөрәк өянәге вакытында исә, авыруны тыныч урынга кертеп, нитроглицерин таблеткасын бирергә кирәк. Аны тел астына салып суырыгыз. Моны утырган килеш эшләү яхшырак булыр. Салкынча су эчеп, ашыгыч ярдәмне чакыртырга да онытмагыз", - дип киңәш итте Венера Гыйльфанова.
Роспотребнадзор күрсәткечләре буенча, соңгы җиде ай эчендә шәһәребездә эчәк инфекцияләре авырулары 28% арткан. Җәйге айларда бактериаль инфекцияләр дә еш теркәлә башлаган. Аларны булдырмас өчен, белгечләр түбәндәге киңәшләрне истә тотарга чакыралар:
- шәхси гигиенаны сакларга
- су керергә рөхсәт ителә торган урыннарда гына йөзәргә
- тиз бозыла торган продуктларны суыткычларда гына сакларга
- ачык грунтлардан суларны эчмәскә
Август аенда да эссе көннәр шактый көтелү сәбәпле, табиплар, аеруча өлкәннәргә һәм балаларга, сәламәтлекләренә игътибарлырак булырга чакыралар.
Альбина ЗАРИПОВА
Следите за самым важным и интересным в Telegram-каналеТатмедиа
Нет комментариев