“Энергосбыт” хезмәткәрләренә 167 мең сум күчергән

67 яшьлек шәһәрдәшебезгә таныш булмаган номердан шалтыратып, үзләрен “Энергосбыт” хезмәткәрләре дип атаганнар. Шалтыратучылар электр исәпләү җайланмаларын алмаштырырга кирәклеген әйткәннәр. “Смс белән заявка номеры килергә тиеш, шуны әйтегез”, - дип сораганнар. Шәһәрдәшебез мошенниклар тозагына эләккәнне аңламыйча, кодны хәбәр иткән. Нәтиҗәдә, шәхси мәгълүматларга юл ачып, банк счетындагы 167 мең сумыннан колак каккан. 
Хатын-кыз балансында акча югалганын аңлагач полициягә шалтыраткан. Җинаять матдәсе буенча, зыян кылучыга 6 елга кадәр ирегеннән мәхрүм ителү яный. 

Гүзәл Шиһапова